الحمام المحشي أرز

الحمام المحشي بكل تفاصيله وتكاته

الحمام المحشي أكلة شهية ولذيذة. تشرفك في العزومات. مغذي جدا وبيقدم كمية طاقة هايلة. هنقدمه النهاردة محشو أرز. طريقة سهلة وتكات بسيطة هتخلي طعمه يجنن..

المقادير:

* حمام حسب عدد الأفراد.
* لكل فردة حمام نص كوب أرز مصري أبيض.
* بصل مبشور.
* ثمرة طماطم.
* بصلة صغيرة.
* ورق لورا.
* حبهان.
* قرفة.
* ملح وفلفل اسود.
* زيت نباتي. او سمن بلدي.


الطريقة:

* نغسل الحمام كويس جدا ونفصل الجلد عن اللحم براحة جدا تحت الحنفية. وبعدين ننقعه في مياه وملح وليمون لمدة نصف ساعة.

* نغسل كمية الأرز المناسبة لعدد الحمام. ننقعه لمدة ربع ساعة.

* نضيف ملح وفلفل اسود على كمية صغيرة من البصل المبشور ونقلبهم مع بعض. و نتبل الحمام من جوة وبرة وتحت الجلد. بيخلي طعم اللحم نفسه حلو جدا.

* في حلة على النار فيها سمن او زيت نضيف باقي البصل المبشور ونقلب لحد ما يدبل، نضيف الأرز بعد ما نصفيه كويس ونشوحه مع البصل ونضيف ملح وفلفل اسود ونقلب.

* لما يبرد نحشي الحمام في البطن وبين الجلد واللحم. كمية الأرز متبقاش كتير اوي عشان لسة هيتضاعف حجمه بعد ما يستوي.

* في حلة على النار فيها ماء وملح وفلفل وبصلة وحبة طماطم وورق لورا وقرفة وحبهان. تكون بتغلي. نحط فيها الحمام.

* أول ربع ساعة تكون النار عالية. بعدها نهدي النار لمدة نصف ساعة.

* نحمر الحمام في زيت وسمن.