تحضير السمن البلدي في المنزل هي أكتر طريقة مضمونة من حيث الجودة والنضافة وكمان موفرة جدا جدا. نظرآ لأن أسعارها أصبحت عالية جدا لو هتشتريها من برة.
طريقتها مش هتكلفك أي حاجة. انتي بطبيعة الحال بتشتري لبن حليب عادي هنطلع منه قشطة وتعمليها سمنة بس كدة. هقولك على تكة تخليكي تطلعي كمية قشطة كويسة جدا.
أولآ .. لازم تختاري لبان يكون اللبن عنده كويس ودسم. يعني لو جربتي حد معين ولقيتي اللبن عنده حلو متغيريهوش اشتري منه دايمآ.
ثانيآ .. حاولي تغلي اللبن في وعاء ألومنيوم أو ستانلس ويُفضل ألومنيوم. أي نوع تاني لأ.
ثالثآ .. غلي اللبن يكون على نار متوسطة ليست عالية ولا هادية.
رابعآ .. و دي التكة المهمة بقى، تقليب اللبن بإستمرار من حين لآخر حتى الغليان.
خامسآ .. ترك اللبن يهدأ تمامآ قبل دخوله الثلاجة.
سادسآ .. يُفضل تركه داخل الثلاجة لمدة لا تقل عن 10 ساعات.
سابعآ .. قومي بفصل وش اللبن (القشطة) بهدوء بإستخدام ملعقة. مع تصفيته من أي حليب.
عندما تتكون لديكي كمية كبيرة من القشطة مثلا كيلو، نفضيها في طبق كبير و بإستخدام المضرب الكهربائي او يديكي (لكن ستأخذ مجهود ووقت أكبر) و قومي بضرب القشطة وتحريك يدك على شكل دائرة، حتى تفصل المياه عن الزبدة. حينها ستتكون كرة من الزبدة لديكي. قومي بوضعها في حلة مناسبة على نار هادئة مع التقليب من الحين للأخر. حتى تتكون سمنة سايحة صافية أمامك وتنزل المورتة إلى قاع الحلة. أتركيها تهدأ، ثو قومي بتعبئتها في برطمان زجاج نظيف معقم. واستخدميها في أكلاتك.
