في إنتظار مولود جديد.. يبقى الموضوع دة عشانك

نصائح ومعلومات يجب أن تعرفيها إذا كنتي في إنتظار قدوم مولود جديد

بقيتي مامي .. بقيت بابي .. نورت حياتكم بـ طلَة فرد جديد في الاسرة .. ألف مبروووك

بيبي جديد يعني فرحة حلوة وحياه جديدة و في نفس الوقت مسؤولية، و عشان نكون قد المسؤولية دي لازم نحافظ على الهدية الجميلة اللي ربنا وهبهالنا. من أول صرخة الحياه و دة أول صوت بيصدره طفلك عشان يقولك يا مامي انا وصلت بالسلامة, ساعتها بس بتبدأي تحسي ان حياتك مهمة عشان بقى ليها معنى وقيمة.

و إليكي بعض المعلومات اللي ممكن تساعدك في ايامه الاولى معاكي:

أولا... الرضاعة 

أعظم رابط في الكون هو ارتباط الأم بطفلها ودة اللي بيحسه الطفل اوي من خلال الرضاعة الطبيعية اللي بيكون تأثيرها مش بس على مشاعر الطفل دي كمان بتأثر تأثير إيجابي وفعال جداا جداا على صحته و ذكائه و تركيزه ونشاطه و تغذيته. لذلك يفضل الرضاعة الطبيعة للطفل وخصوصا في الساعات الأولى من الولادة.

ثانيا ... صحة الطفل

جزء من مسؤوليتك كأم أو حتى أب انك تكون مطئن على صحة مولودك واللي بيحددها طبيب أطفال يقوم بفحصه فحص شامل فور الولادة. الحمد لله الرضيع بخير وخالي من أي عيب خلقي أو مرض يجي هنا دورنا احنا الاهل بقى في اننا نكمل حفاظ عليه عن طريق اللبس النظيف ، التدفئة المناسبة، الرضاعة ، عدم ملامسة الطفل عن قرب حفاظا عليه من أي عدوى نظرا لضعف مناعته، متابعة تنفسه وإخراجه.

ثالثا ... دور الأهل والأقارب

طبعا فرحانين و سعداء بإنضمام طفل جديد للعائلة و كلنا رايحين نهني ونبارك، بس في شروط زي مثلا الكلمة الطيبة صدقة فياريت نحسن إختيار ألفاظنا فبلاش بقى كلمات زي ايه الوحاشة دي , البيبي اسمر كدة ليه ,,,,, و غيرهم كتييير من جمل سخيفة ملهاش اي لزمة ولا توحي بأي خفة دم دة غير انها مؤذية جدا.. كمان الطفل الرضيع دة مش مجبر انه يتشال ويتهز و يتلطخ وجهه بكمية قبلات من عشرات الاشخاص كتعبير عن حبهم واللي ممكن جدا بسهولة تنقله اي عدوى زي ما ذكرنا فوق.

رابعا... الأم

ألف مبروك يا ست الحبايب و حمدالله على سلامتك وسلامة طفلك, نصيحتي ليكي حاولي ترتاحي ع قد ما تقدري و متنسيش التغذية السليمة عشان تقدري تقومي بدورك على أكمل وجه. و ميمنعش طبعا تطلبي المساعدة من اي شخص قريب منك. المهمة جميلة بس مش سهلة, و كل الاسرة ليها دور دي مش مسؤوليتك لوحدك انتي بس واخدة أكبر جزء فيها.