الكنافة النابلسية

الكنافة النابلسية هي حلوى شهية ولذيذة، ظهرت وانتشرت مؤخرآ بصورة كبيرة، حتى أن بدات المحلات في صنعها وبيعها بأسعار متفاوتة. هنقدمهالك بمقادير سهلة وطريقة بسيطة جدا والنتيجة هتعجب كل اللي هياكل منها.

المقادير:

* نصف كيلو كنافة.

* ١٥٠ جرام من الجبن العكاوي ( يمكن استخدام الجبن الموتزاريلا كبديل).

* لون غذائي برتقالي ( يمكن الإستغناء عنه).

* كوب إلا ربع سمن. 

* كوب ونصف سكر.

* كوب ماء.

* عصير نصف ليمونة.

الطريقة:

* في طبق فيه ماء دافي ننقع الجبن لمدة نصف ساعة للتخلص من نسبة الملح. 

* في كسرولة على النار نضيف السكر والماء وعصير الليمون ونقلبهم ونتركه على النار حتى الغليان. نتركه يبرد تماما. 

* نفرك الكنافة المجمدة لتصبح ناعمة وصغيرة. نضيف عليها السمن ونقطتين من اللون الغذائي. ونقلبها حتى تتغلف كل الكنافة بالسمن. 

* في صينية مقاس ٢٦ نفرد طبقة الكنافة ونضغط عليها كويس، نفرد عليها طبقة الجبنة بحيث تكون بعيدة عن الأطراف. 

* نسويها على البوتجاز. علي نار هادية مع تحريك الصينية علي جميع الجوانب. لمدة تلت ساعة حتى تستوي. 

* نقلبها على طبق التقديم. ونسقيها بالشربات البارد. تُقدم ساخنة. 

القطايف

القطايف نوع من الحلويات الرمضانية. لا غنى عنها في الشهر الكريم. هنقدمها بمكونات بسيطة جدا جدا وطريقة سهلة وسريعة ونتيجة تحفة.

(لتحضير الشربات)

المقادير:

* عدد 2 كوب سكر.

* عدد كوب ونصف ماء.

* معلقة كبيرة عصير ليمون.

الطريقة:

 * نضيف كل المكونات في كسرولة على النار لحد الغليان.

* نقفل النار ونسيبه يبرد تماما.

(لتحضير العجينة)

المقادير:

* عدد 2 كوب دقيق جميع الأغراض منخول.

* كوب لبن حليب دافئ

* كوب ماء بدرجة حرارة الغرفة.

* معلقة كبيرة لبن بودرة.

* معلقة كبيرة خميرة.

* معلقة كبيرة سكر.

* رشة ملح.

الطريقة:

* نضيف كل المكونات في الخلاط الكهربائي ونضربهم كويس جدا.

* نصفي الخليط في دورق أو بولة ونغطيه في مكان دافئ ليختمر.

* بعد الإختمار. ناخد كمية بالمغرفة ونفردها على شكل دايرة صغيرة في صينية مبتلزقش مدهونة زيت بسيط على نار متوسطة.

* اول ما تختفي الفقاقيع اللي على الوش نشيل القطايف نفردها على فوطة مطبخ نضيفة.

(لتحضير الحشو)

المقادير:

* زبيب - جوز الهند 

* قشطة حلويات.

* شيكولاتة قابلة للدهن. نوتيلا.

الطريقة:

* نحشي القطايف ونقفلها كويس وندوس عليها بشوكة عشان متفتحش في الزيت.

* نقليها في زيت ساخن غزير على نار متوسطة. حتى تأخذ لون ذهبي.

* تطلع من الزيت على الشربات. نقلبها في الشربات ونشيلها نصفيها بإستخدام معلقة أخرى.

* يمكن تزيينها بالفستق المجروش.

مربى الفراولة

مربى الفراولة حلوى لذيذة وطريقتها سهلة جدا. تقدر تاكلها لوحدها كتحلية، وكمان تنفع في سندوتشات للفطار أو العشاء.

المقادير:

* عدد 3 كيلو فراولة.

* كيلو سكر.

* ربع معلقة قرفة باودر.

* ربع كوب عصير ليمون.



الطريقة:

* نقوم بتنضيف حبات الفراولة عن طريق نزع الورقة الخضراء وغسلها كويس جدا.

* نضيف السكر على الفراولة ونقلبهم مع بعض، نتركهم معا لمدة لا تقل عن ساعتين.

* بعدها نحط الخليط على نار متوسطة حتى الغليان ( تقريبا لمدة نصف ساعة).

* بعدها نهدي النار لمدة ساعة مع التقليب.

* نضيف عصير الليمون والقرفة ونقلب كويس.

* نتركها تغلي مدة ربع ساعة وبعدين نقفل النار.

* بعد ما تبرد نفضيها في برطمان زجاج نضيف ومعقم، وتحفظ في الثلاجة.

اللبن المكثف المحلى

اللبن المكثف المُحلى لاغنى عنه في الحلويات، بنشتريه بأسعار غالية. هنعمله في البيت بمنتهى السهولة وبمكونات متوفرة دايما في مطبخك.

اللبن المكثف المحلى

المقادير:

* كوب لبن بودرة.
* كوب سكر بودرة.
*مكعب زبدة.
* ربع كوب ماء ساخن.

الطريقة:

* في الخلاط أو بإستخدام المضرب الكهربائي نخلط المكونات.

* نضيف الماء الساخن ونضرب جيدا.

* يدخل التلاجة لحد ما يبرد ويصبح جاهز للإستخدام.

كيك الشيكولاتة بدون بيض أو حليب

كيك الشيكولاتة بدون بيض أو حليب

كيك الشيكولاتة بدون بيض أو حليب

كيك الشيكولاتة وصفة سهلة هنعملها النهاردة من غير حليب ومن غير بيض كمان.

المقادير:

* كوب ونص دقيق منخول
* كوب سكر
* معلقتين كاكاو
* ظرف فانيليا
* ظرف بيكنج باودر
* كوب ماء 200 مللي
* نصف كوب زيت 

الطريقة:

* نقلب المكونات الجافة مع بعض حتى تختلط.

* نضيف الماء والزيت ونقلب بالمضرب كويس جدا لحد ما يصبح الخليط متجانس.

* في صينية مقاس 24 مدهونة زيت ومتبطنة بدقيق او كاكاو تدخل فرن درجة حرارة 170 على الرف الأوسط لمدة 35 دقيقة.

للتغطية  (صوص الشيكولاتة):

* عدد 4 ملاعق كبيرة حليب.
* 80 جرام شيكولاتة مطبخ غامقة.


* نسخن الحليب حتى يغلي.
* نضيف الشيكولاتة ونقلب الخليط لحد ما تدوب ويصبح صوص تقيل.
* نسيبه لحد ما يهدى شوية وبعدين نضيفه على سطح الكيك.
* تدخل التلاجة ساعة وبعدين نقدمها.
* ممكن تزيينها بأي مكسرات أو حبات الفراولة.

تحضير كيك الماج في الميكروويف

تحضير كيك الماج في الميكروويف

كيك الماج في الميكروويف

كيك الماج. وصفة تحلية سهلة وبسيطة. ممكن تحضريها في خمس دقائي وكمان هتقدري تعمليها في الميكرويف. لو جالك ضيوف فجأة هتبقى هي المنقذ. هنقدمها النهاردة بمكونات متوفرة في كل بيت وكمان من غير بيض.

المقادير:

* ربع كوب دقيق.

* عدد 2 معلقة كبيرة سكر.

* معلقة كبيرة كاكاو.

* نصف معلقة صغيرة بيكنج باودر.

* ربع كوب لبن حليب.

* عدد 3 ملاعق كبيرة زيت.

الطريقة:

* نخلط جميع المكونات مع بعض في الماج ونقلبهم كويس جدا بإستخدام بشوكة.

* تدخل الميكرويف لمدة 3 دقائق.

* ممكن تقديمها مع بولة أيسكريم.

الكنافة بحشوة الموز والمكسرات

طريقة تحضير الكنافة بحشوة الموز والمكسرات

الكنافة نوع من الحلويات الشرقية المفضلة لدى الصغير والكبير، تطورت أنواعها وأصنافها مع إختلاف الحشوات. النهاردة هنقدمها بحشوة جديدة هتعجب كل اللي هياكلوها. بطريقة سهلة ومكوناتها موجودة في كل بيت.

المقادير:

* نصف كيلو كنافة.

* ربع كوب سكر بودرة.

* كوب سمن دافئ.

* شرائح موز.

* فول سوداني أو لوز أو فستق مطحون.

* ربع معلقة صغيرة قرفة.

للشربات:

* كوبان ونصف سكر.

* كوبان ماء.

* عصير نصف ليمونة.

* فانيليا.

الطريقة:

* نحضر الشربات مسبقا. في كسرولة نضيف السكر والماء ونتركهم يغلو بعدين نضيف الفانيليا وعصير الليمون. نتركهم يغلي وبعدين نسيبه يبرد خالص.

* نفرك الكنافة وهي مجمدة ثم نضيف عليها السكر البودرة ونقلبها.

* نضيف السمن ونفرك الكنافة كويس جدا حتى تتشرب الكنافة كل السمن.

* في صينية مقاس 26 نضيف نصف كمية الكنافة ونضغطها كويس أوي بإستخدام صينية أصغر وبعدين نرص شرائح الموز ونرش فوقه القرفة ونوع المكسرات المتوفر عندك.

* نضيف باقي كمية الكنافة ونضغط. ممكن نضيف على الوش معلقتين سمن سايحة.

* تدخل فرن على الأرضية درجة حرارة عالية. حتى تحمر الجوانب نقلبها على الوش التاني لمدة ربع ساعة.

* لما تطلع من الفرن نسقيها بشربات بارد.