تتبيلات سهلة لوصفات مختلفة من الدجاج

تتبيلات سهلة لوصفات مختلفة من الدجاج

الدجاج أساسي في أي أكلة. ودلوقتي الوضع تطور وأصبح في منها أشكال ووصفات كتيير أوي. هنستعرض مع بعض أكتر من وصفة مختلفة بتتبيلة لذيذة هتحضريها من الدجاج.


الدجاج المشوي:

 بصلة متوسطة - حبة طماطم متوسطة - فصين توم - ملعقة كبيرة صلصة - ملعقة صغيرة عسل نحل - ملح - فلفل اسود - بابريكا - كمون - السبع بهارات - زعتر . نضربهم في الخلاط.

البانيه: 

علبة زبادي - معلقة صغيرة من توم باودر - بصل باودر - كمون - كركم - بابريكا - ملح - فلفل اسود.

شيش طاووق:

عصير ليمون - معلقة صغيرة من توم باودر - بصل باودر - كركم - زعتر - ملح وفلفل اسود.

شاورما:

كوب زبادي - عصير ليمون - ملعقة كبيرة توم باودر - معلقة صغيرة خل - كمون - كركم - زنجبيل - ملح وفلفل اسود.

أجنحة سبايسي:

معلقة كبيرة صلصة - معلقة صغيرة هريسة شطة - زعتر - روزماري - كسبرة ناشفة - توم باودر - بصل باودر - ملح وفلفل اسود.

أوراك دجاج:

معلقة كبيرة صلصة - معلقة صغيرة عسل نحل - روزماري - سماق - ملح وفلفل اسود.

صدور مخلية جريل:

كوب زبادي - معلقة صغيرة خل - عصير ليمون - ممعلقة صغيرة بابريكا - كركم - توم باودر - بصل باودر - ملح وفلفل اسود.

لو عندك وصفة جديدة اكتبيها في تعليق عشان غيرك يستفيد

أفكار لعزائم رمضان

أفكارمختلفة لعزائم رمضان

باقي أيام ويوصل شهر الخير والبركة، أفضل شهور السنة. شهر رمضان الكريم، ومعاه بتزيد نسبة العزومات وصلة الرحم. و كمان بتزيد حيرة ست البيت هتقدم ايه في العزومة. عشان كدة جبنالك هنا أفكار هتساعدك في الوصفات اللي تقدميها على سفرتك في اي عزومة في شهر الخير.


أولا: الصواني

صينية مكرونة بشاميل (طريقة تحضير المكرونة بالبشاميل) - صينية جلاش بالخضار والجبن (الجلاش بكل تفاصيله) - صينية بطاطس باللحمة المفرومة - سمبوسك - صينية فراخ مشوية في الفرن (طريقة الفراخ المشوية في الفرن) - سلطات 

ثانيآ: الطواجن

طاجن بامية بالعكاوي - طاجن بطاطس باللحمة والصلصة - طاجن أرز معمر - طاجن تورلي - طاجن لسان عصفور بالكبدة - سلطات

ثالثآ: المشاوي

كفتة حاتي (كفتة الحاتي بكل تفاصيلها) - طرب - كبدة مشوية - كباب مشوي - خضار مشوي (فلفل وطماطم وباذنجان رومي) - سلطة طحينة - سلطة بابا غنوج (طريقة عمل البابا غنوج بالتفصيل) - عيش بلدي

رابعآ: المحاشي

محشي ورق عنب وفلفل وباذنجان - بط مسلوق ومحمر - شوربة لسان عصفور - سلطة خضراء

محشي كرنب - فراخ بلدي محمرة - جلاش محشي رول - سلطة خضراء

خامسآ: النواشف

أرز بسمتي أصفر - كفتة فرن - فراخ مشوية جريل - سمبوسك - سلطة طحينة - سلطة خضراء 

سادسآ: الطبيخ

أرز بشعرية - لوبيا - فاصوليا خضراء - شوربة لسان عصفور - قطع لحم مسلوقة ومحمرة - سلطة خضراء

سابعآ: الأسماك

سمك بوري سنجاري - سمك بلطي مشوي (طريقة جديدة لشوي السمك) - سمك ماكريل صينية - أرز صيادية - أرز أبيض - سلطة طحينة - مسقعة (راجعي المسقعة بكل تفاصيلها) - سلطة خضراء

ثامنآ: السندوتشات

كريب شاورما فراخ - شاورما لحم - ناجتس - بانيه - كنتاكي - سلطة مايونيز - تومية - مخللات - بطاطس محمرة

صينية جلاش بحشوة الخضار والجبن المشكلة

صينية جلاش بحشوة الخضار والجبن المشكلة

الجلاش وصفة سهلة ولذيذة. ممكن تحضريها حلو وحادق. هنقدمها النهاردة حادق بحشوة موفرة واقتصادية ومكوناتها موجودة في كل بيت.

المقادير:

* عدد ٨ ورقات من الجلاش.
* زيتون مخلي شرائح.
* فلفل ألوان شرائح رفيعة.
* بصل شرائح رفيعة.
* مشروم شرائح.
* جبن مشكل.
* كوب لبن حليب.
* بيضة.
* ملح وفلفل اسود.
* عدد ٣ ملاعق كبار سمن دافئ. 

الطريقة:

* في حلة على النار نشوح كل الخضار مع بعض ونضيف الملح والفلفل حسب الرغبة.

* في صينية مقاس ٢٦ مدهونة سمن نرص ٤ طبقات من الجلاش مفصولين بدهنة من السمن.

* نضيف الحشوة و شوية من ادجبن المشكلة.

* نرص باقي طبقات الجلاش مفصولين بدهنة سمن.

* نكسر البيضة في كوب حليب ونضيف ملح وفلفل ونقلبها كويس. ونضيفها على وش الصينية.

* تدخل فرن ساخن على الرف الاوسط لمدة ٢٠ دقيقة مع تشغيل الشواية اخر خمس دقائق.

الكنافة بحشوة الموز والمكسرات

طريقة تحضير الكنافة بحشوة الموز والمكسرات

الكنافة نوع من الحلويات الشرقية المفضلة لدى الصغير والكبير، تطورت أنواعها وأصنافها مع إختلاف الحشوات. النهاردة هنقدمها بحشوة جديدة هتعجب كل اللي هياكلوها. بطريقة سهلة ومكوناتها موجودة في كل بيت.

المقادير:

* نصف كيلو كنافة.

* ربع كوب سكر بودرة.

* كوب سمن دافئ.

* شرائح موز.

* فول سوداني أو لوز أو فستق مطحون.

* ربع معلقة صغيرة قرفة.

للشربات:

* كوبان ونصف سكر.

* كوبان ماء.

* عصير نصف ليمونة.

* فانيليا.

الطريقة:

* نحضر الشربات مسبقا. في كسرولة نضيف السكر والماء ونتركهم يغلو بعدين نضيف الفانيليا وعصير الليمون. نتركهم يغلي وبعدين نسيبه يبرد خالص.

* نفرك الكنافة وهي مجمدة ثم نضيف عليها السكر البودرة ونقلبها.

* نضيف السمن ونفرك الكنافة كويس جدا حتى تتشرب الكنافة كل السمن.

* في صينية مقاس 26 نضيف نصف كمية الكنافة ونضغطها كويس أوي بإستخدام صينية أصغر وبعدين نرص شرائح الموز ونرش فوقه القرفة ونوع المكسرات المتوفر عندك.

* نضيف باقي كمية الكنافة ونضغط. ممكن نضيف على الوش معلقتين سمن سايحة.

* تدخل فرن على الأرضية درجة حرارة عالية. حتى تحمر الجوانب نقلبها على الوش التاني لمدة ربع ساعة.

* لما تطلع من الفرن نسقيها بشربات بارد.

وصفات باللحم المفروم

وصفات مختلفة تقدري تحضريها بإستخدام اللحم المفروم

 حيرة كل يوم هناكل ايه النهاردة .. أحيانا بتكوني عايزة وصفة سهلة متاخدش وقت ومجهود. هنقدملك هنا وصفات تقدري تعمليها باللحم المفروم.


كفتة الصينية:

نصف كيلو لحم مفروم + ثمرة من الفلفل الرومي الأخضر والأصفر والأحمر + حبة طماطم مقشرة + حبة بصل متوسطة الحجم مبشورة + ملح وفلفل + كمون وكسبرة + قرفة والسبع بهارات.

نخلط المكونات مع بعض كويس جدا ونشكلها كرات ونرصها في صينية وتدخل الفرن مدة نصف ساعة على الرف الأوسط درجة حرارة 180.


عصاج للسندوتشات:

ربع كيلو لحم مفروم + ثمرة فلفل أخضر رومي كبيرة + حبة بصل كبيرة مقطعة قطع صغيرة + زيت نباتي + ملح وفلفل وجوزة الطيب + معلقة صلصة.

 في حلة على النار نضيف الزيت والبصل ونقلب لحد ما يذبل البصل وبعدين نضيف الفلفل الرومي ونقلب، لما يدبلو نضيف اللحم والصلصة والملح والفلفل وجوزة الطيب ونقلب. وبعدين نهدي النار لحد ما تستوي.

كفتة حاتي:

كيلو من اللحم المفروم عليه نسبة دهن + تفل بصلة صغيرة مفرومة ناعم + ملح وفلفل + ربع معلقة سكر + ربع معلقة بيكنج باودر.

نخلط المكونات مع بعض ونعجنها كويس اوي ونشكلها على سيخ ونشويها على الفحم.

حواوشي: 

نصف كيلو من اللحم المفروم + قطعة دهن مفرومة + ثمرة فلفل أخضر رومي  مقطعة صغيرة + ثمرة بصل مقطعة صغير + ثمرة طماطم مبشورة + ملح وفلفل ومعلقة كبيرة بهارات حواوشي.

نعجن المكونات مع بعض كويس اوي ونشكلها قطع صغيرة ونفرد كل قطعة في رغيف بلدي ونرصه في صينية ويدخل الفرن، من الممكن أيضا تسويته في طاسة على البوتجاز.

بفتيك كداب:

نص كيلو لحم مفروم + معلقة كبيرة بقسماط ناعم + ملح وفلفل وكمون + توم باودر وبصل باودر.

نعجن المكونات كويس جدا ونفردها في سترتش وتدخل التلاجة ساعة، لما تطلع نحطها في دقيق وبيض وبقسماط ونقليها في الزيت.

برجر:

كيلو من اللحم المفروم ناعم + ملح وفلفل + معلقة صغيرة بهارات برجر.

نعجن المكونات مع بعض كويس جدا ونشكلها أقراص دائرية بإستخدام مكبس البرجر أو غطاء برطمان، نرصها في طبق منفصلة بقطع من الأكياس التلاجة الشفافة. تدخل التلاجة ساعة وبعدين نشويها في الفرن أو على الجريل.

المكرونة بالبشاميل:

مكرونة فرن مسلوقة + ربع كيلو لحم مفروم ( نحضره بطريقة العصاج) + لتر حليب + 3 معالق كبار دقيق + معلقتين كبار سمن + ملح وفلفل

لتحضير البشاميل في حلة على النار نضيف السمن والدقيق ونقلب حتى يأخذ لون ذهبي وبعدين نضيف الحليب ونقلب ونحط الملح والفلفل. نضيف نصف البشاميل على المكرونة ونقلبها. في صينية نرص طبقة مكرونة وطبقة العصاج وبعدين طبقة مكرونة ونضيف باقي البشاميل. 

راجعي طريقة عمل المكرونة بالبشامل بكل تفاصيلها

جلاش باللحمة المفرومة:

لفة جلاش + ربع كيلو لحم مفروم ( نحضره بطريقة العصاج) + بيضة + كوب حليب + ملح وفلفل + ربع معلقة بيكنج باودر+ معلقتين كبار سمن دافئ.

في صينية مدهونة سمن نرصة أربع ورقات من الجلاش. بين كل ورقتين ندهن سمن. نفرد طبقة العصاج ونرص أربع ورقات جلاش مدهونين سمن. نقلب البيضة والملح والفلفل والبيكنج باودر في كوب الحليب ونضيفها على وش الصينية. تدخل فرن على الرف الاوسط. درجة حرارة 180 لمدة نصف ساعة. ونفتح الشواية خمس دقايق تاخد لون.

لو عندك وصفة جديدة ضيفيها في تعليق، عشان غيرك يستفيد.. 

طريقة جديدة لشوي السمك في البيت

طريقة جديدة لشوي السمك في البيت

السمك المشوي أكلة لذيذة وسهلة ومغذية جدآ، تنفع أوي كمان للناس اللي بتعمل ريجيم. لانه سهل الهضم. فـ بيكون خفيف جدا على المعدة. لكن عشان تشويه في البيت بيعمل دخان كثيف وبيقلب ريحة المكان وبيكون صعب جدا التخلص من الدخان دة. النهاردة هنقدملك طريقة سهلة جدا عشان تحضري السمك المشوي في البيت من غير ما تحتاجي تشترييه مشوي جاهز من برة فتضمني النضافة وكمان مش هيعملك دخان في كل الشقة.

المقادير:

* سمك بلطي أو بوري أو ماكريل حسب العدد.
* جزر وفلفل رومي وبصل وثوم وطماطم مبشورين قطع رفيعة جدا.
* ملح وكمون وكسبرة وخل وليمون.
* ردة.
* دقة ثوم.

الطريقة:

* السمك مغسول ومنقوع ونصفيه ويكون نضيف جدا.

* نضيف معلقتين كبار من دقة الثوم على الخضار المبشور ونضيف ربع كوب خل وربع كوب عصير ليمون ومعلقة صغيرة من الملح والفلفل والكمون والكسبرة ونقلبهم مع بعض.

* نضع كمية من الخضار المتبل في بطن السمك ونقفل.

* نغطي السمك بالردة.

* التكنيك الجديد هنا بقى هنشويه ازاي. هنرص السمك في صينية وندخله الفرن بس مش شغال. هنشغل بس الشواية بتاعت الفرن.

* لما ياخد لون نقلبه الناحية التانية.

* ملحوظة: يفضل يكون الرف بعيد عن الشواية اول نص ساعة عشان السمك يستوي. بعدها ممكن تقربيه للشواية عشان ياخد لون بسرعة.

* هياخد تلت ساعة على كل ناحية لو السمك صغير أو متوسط الحجم.

* لما نطلعه من الفرن نحط السمك في ماء التتبيلة ( ماء + معلقتين كبار من دقة التوم).

* يقدم مع رز أبيض.

المكرونة بالبشاميل بكل تفاصيلها

المكرونة بالبشاميل بكل تفاصيلها

المكرونة بالبشاميل هي ملكة العزومات، طعمها لذيذ ويفضلها الصغير قبل الكبير. تكلفتها بسيطة ولكنها ذات قيمة غذائية عالية.

المقادير:

* كيس مكرونة فرن.

* ربع كيلو لحمة مفرومة.

* بصلة كبيرة مقطعة قطع صغيرة.

* ثمرة فلفل أخضر مقطعة قطع صغيرة.

* لتر حليب.

* 3 معلقة سمن.

* 3 معلقة دقيق كبار.

* قشطة.

* ملح وفلفل اسود.

* زيت نباتي.

الطريقة:

* لتحضير العصاج في حلة على النار نضع 3 معالق زيت نباتي ونضيف البصل والفلفل الأخضر ونقلبه حتى يذبل. ثم نضيف اللحم المفروم والملح والفلفل الاسود ونقلب المكونات. نغطي ونهدي النار ونقلب كل شوية لحد ما تستوي.

* نسلق المكرونة نص سلقة في حلة فيها ماية وملح. وبعدين نصفيها.

* لتحضير البشاميل في حلة نضيف 3 معالق سمن يسيحوا ونضيف 3 معالق كبار دقيق أبيض ونقلب لحد ما ياخد لون فاتح، ثم نضيف الحليب البارد ونقلب لحد ما نحصل على قوام اتقل ثم نضيف الملح والفلفل الاسود وفي الآخر نضيف معلقة قشطة كبيرة ونقلبها في البشاميل يفضل ان يكون قوامه ليس ثقيل جدا.

* نأخد تقريبا تلت كمية البشاميل نضيفها على المكرونة المصفاه ونقلبها. ثم نقسم كمية المكرونة إلى جزئين

* في صينية أو بيركس مقاس 24 نضيف كمية قليلة من البشاميل كتبطين لأرضية الصينية ثم طبقة من المكرونة ثم طبقة العصاج ثم طبقة مكرونة، ثم نسكب باقي البشاميل على المكرونة حتى يغطيها تماما.

* على الوجه نوزع معلقتين قشطة في الصينية.

* تدخل فرن درجة حرارة 200 على الرف الأوسط حتى تحمر الجوانب، ثم نشغل الشواية حتى يحمر الوجه.

الكشري المصري

طريقة سهلة وسريعة لعمل الكشري المصري في وقت قليل

طبعا مفيش حد في مصر كلها ما أكلش منه، دة حتى معروف بإسمنا. الكشري المصري حاجة كدة حرشة ومشبعة ومن الآخر. وجبة جميلة وبتسد في أي ظرف إقتصادي، أخر الشهر ماشي، الميزانية خرمت مايضرش. هتلاقيه بيسد في أي غدا ميقولش لأ.

المقادير:

* مكرونة مشكلة.
* أرز مصري.
* عدس بجبة.
* شعيرية.
* حمص الشام.
* عصير طماطم.
*  أربعة فصوص ثوم مفروم.
* خل.
* زيت.
* توابل ملح وفلفل إسود وكمون وشطة.
* شرائح بصل.

الطريقة:

* في حلة فيها ماية وكمون وملح هنسلق العدس نص سلقة، وبعدين نصفيه، ونسلق المكرونة.

* نسلق الحمص في حلة الضغط لانه بياخد وقت، أو يفضل يكون منقوع من قبلها بأربع ساعات

* نغسل الأرز جيدا ونصفيه. نحمر الشعيرية حتى تأخذ لون ذهبي، نضيف الأرز والملح والماية ونقلب.

* لما الأرز يتشرب الماية نضيف العدس المسلوق، ونهدي النار لحد ما يستوي.

* نتبل شرايح البصل بمعلقة دقيق ونقليه في الزيت لحد ما ياخد لون ذهبي.

* بعد التسوية نضيف المكونات مع بعضها في حلة واحدة ونقلبهم.

* لتحضير الصلصة في كسرولة هنضيف عصير الطماطم معاه جزء من الثوم المفروم 
ومعلقتين كبار زيت ومعلقة خل وكمون وملح وفلفل إسود ورشة سكر عشان متسببش حموضة.

* لتحضير الدقة كوب ماء مع معلقتين خل وباقي التوم المفروم وملح وفلفل. ( ممكن تعمليهم ع البارد أو ياخدو غلوة على النار)

* لتحضير الشطة في طاسة على النار هنضيف معلقة شطة صغيرة ومعلقتين كبار زيت ونقلبهم دقيقة ونضيف شوية من عصير الطماطم.

الفتة المصرية

طريقة عمل الفتة المصرية

فتة الأرز أو الفتة باللحمة إختلفت المسميات، هي أكلة مصرية لذيذة و سهلة. وجديرة بأنها تكون في عزومة لوحدها.
يقال أنها سُميت فتة لإستخدام قطع الخبز المفتت فيها. يمكن تقديمها باللحم الضاني أو البتلو.

المقادير:

* أرز مصري.
* لحم مسلوق.
* شوربة اللحم.
* قطع صغيرة من الخبز المحمص.
* عصير طماطم.
* ثوم مفروم.
* ملح وفلفل إسود وكسبرة ناشفة.
* معلقة كبيرة خل.

الطريقة:

* نغسل الأرز جيدا ونصفيه. في حلة نضيف مادة دهنية ونضيف الأرز ونقلب حتى يتشرب الأرز المادة الدهنية.

* نضيف الماء والملح ونتركه حتى ينضج.

* في حلة نضيف معلقة زيت وجزء من التوم المفروم وملعقة صغيرة من الكسبرة الناشفة ونشوحه حتى يأخذ لون ذهبي.

* نضيف معلقة من الخل ونضيف الشوربة والملح والفلفل الاسود.

* في كسرولة هنضيف معلقة زيت وباقي التوم المفروم ونشوحه حتى يأخذ لون ذهبي ثم نضيف عصير الطماطم والملح والفلفل الإسود ونتركها حتى تتسبك.

* للتقديم في سرفيس نرص طبقة من الخبز المحمص ونسقيها كمية قليلة من الشوربة ثم طبقة من الأرز ونسقيها بكمية من الشوربة ونضع الصلصة وقطع اللحمة المتحمرة.

الكفتة المشوية عالفحم ( كفتة الحاتي)

طريقة عمل كفتة الحاتي بكل تفاصيلها

تعتبر المشاوي من الوجبات المفضلة لدى الصغير والكبير، وتتميز أيضا بأنها أكلات صحية لخلوها من أي دهون أو كربوهيدرات بالتالي لا تؤذي الجسم ولا تسبب زيادة في الوزن لذا فهي مفضلة أيضا لأصحاب الريجيم والحمية الغذائية. كفتة الحاتي هي إحدي وصفات هذه المشاوي هنقدمهالك النهاردة بالمقادير المظبوطة وهتكون نتيجتها تحفة هتبهري بيها ضيوفك.

المقادير:

* كيلو من اللحم المفروم الناعم.

* قطعة من اللِية أو الدهن المفروم ناعم جدا.

* تفل بصلة متوسطة مفرومة ناعم جدا، نصفيها كويس من الماية.

* معلقة صغيرة بيكنج باودر.

* ملح وفلفل إسود.

* رشة سكر حتى لا تسبب حموضة.

الطريقة:

* نضع كل المكونات معآ ونقوم بعجنها جيدا لتصبح نسيجها متماسك.

* نشكلها صوابع على السيخ لتكون مجوفة من الداخل لسهولة النضج والتسوية.

* يمكن الشواء في أسياخ على الفحم، أو نرصها في صينية وتدخل الفرن.

* تقدم مع عيش بلدي وسلطات.

طريقة عمل سلطة البابا غنوج

أسهل طريقة لتحضيرسلطة البابا غنوج

تعتبر سلطة البابا غنوج من الأكلات الشعبية الحرشة المغذية والصحية في نفس الوقت. يفضل تناولها بجانب المشاوي، ومن الممكن أيضا تناولها وحدها مع الخبز البلدي والجرجير كوجبة إقتصادية وموفرة. هنقدمهولك النهاردة بطريقة سهلة وسريعة.


المقادير:

* باذنجان رومي.
* فلفل أخضر رومي.
* طماطم.
* معلقة صغيرة ثوم مفروم.
* كسبرة خضراء.
* ملح وفلفل اسود وكمون.
* معلقتين كبار طحينة.
* عصير نصف ليمونة.

الطريقة:

* نشوي الباذنجان والفلفل والطماطم حتى النضج.

* بعد النضج نهرسهم في طبق مع بعض.

* في طاسة نضيف معلقة زيت ونضيف الثوم المفروم ومعلقة صغيرة كسبرة ناشفة 
ونقلب حتى تأخذ لون ذهبي.

* نضيف تقلية الثوم على خليط الباذنجان والفلفل والطماطم.

* نضيف الملح والفلفل الاسود والكمون وعصير الليمون والطحينة ونقلب.

* نزين بالكسبرة الخضراء.

الدجاج المشوي (الفراخ المشوية) في الفرن

وصفة الفراخ المشوية بالفرن بتتبيلة تحفة

الدجاج لا غنى عنه في أي مائدة طعام. موجود دايما في الولائم والعزومات و حتى في وجبة الطعام العادية. أصنافه كتيرة و أشكاله أكتر، وتقدري تقدميه بأكثر من طريقة. هنقدمه النهاردة مشوي في صينية في الفرن مع تتبيلة رائعة.


المقادير:

* دجاجة وزن كيلو ونصف مقطعة أربعة أجزاء.

* بصلة متوسطة مفرومة ناعم.

* معلقة صغيرة زنجبيل فريش مفروم.

* حبة طماطم صغيرة مبشورة.

* ربع كوب مياه غازية (يفضل سفن أب).

* ملعقة صغيرة من الكمون والكسبرة والتوم الباودر والسبع بهارات.

* ملح ، وفلفل أسود.

* زبادي.

الطريقة:

* نغسل الدجاجة جيدا.

* في وعاء نضع كل مكونات التتبيلة و نقلبها جيدا.

* نضع قطع الدجاج في التتبيلة ونقلبها كويس جدا لتدخل التتبيلة في جميع أجزاء الدجاج.

* يفضل ان تكون الدجاجة في التتبيلة لمدة ليلة كاملة.

* نرصها في صينية و تدخل فرن درجة حرارة 200 لمدة 40 دقيقة و درجة حرارة 180 لمدة 30 دقيقة.

القراقيش الفلاحي (المنين)

طريقة سهلة ومضمونة لعمل القراقيش الفلاحي (المنين)

القراقيش الفلاحي او المنين وصفة هايلة هايلة اوي ولذيذة وتنفعك في فطار سريع مع كوب شاي بلبن هنقدمها النهاردة بمقادير مظبوطة وطريقة سهلة والنتيجة مضمونة والطعم تحفة..

المقادير:

* كيلو دقيق أبيض جميع الأغراض.
* رشة ملح.
* ملعقة كبيرة خميرة.
* ملعقة كبيرة سكر.
* ٣ معالق كبار سمسم محمص.
* ٢ كوب سمن دافئ.
* ماء او حليب دافئ للعجن.

الطريقة:

* في اناء كبير نضع كل المكونات الجافة مع اختبار الخميرة في حالة عدم التأكد منها.

* نضيف السمن ونفرك الدقيق بالسمن حتى يصبح رملي.

* نضيف الماء او الحليب ونعجن.

* يترك العجين في مكان دافئ ليختمر.

* بعد الإختمار نأخذ جزء من العجين ونشكله حسب الشكل المرغوب ومن الممكن نحشيه عجوة، وهكذا حتى تنتهي الكمية.

* يدخل فرن ساخن حتى تمام النضج.

القرص الفلاحي الطرية

مقادير وطريقة القرص الفلاحي الطرية

القرص الطرية الفلاحي تقدري تقدميها في الفطار والعشا مع جبنة بيضا او كوباية شاي بلبن. طعمها لذيذ ومغذية جدا وطريقتها سهلة جدا ومضمونة من اول مرة.

المقادير:

* كيلو دقيق أبيض جميع الأغراض.
* باكو خميرة صغير.
* رشة ملح.
* معلقتين كبار قشطة.
* كوب سمن سايح.
* لبن رايب للعجن.

الطريقة:

* في طبق كبير توضع كل المكونات الجافة وتقلب معا.

* يتم اختبار الخميرة في ربع كوب ماء دافئ في حالة عدم التأكد منها.

* نضيف القشطة والسمن ونقلب الخليط.

* نضيف الخميرة بعد ما ارتفعت واللبن الرايب ونعجن مش كتير.

* توضع في مكان دافئ لمدة ساعة لتختمر.

* بعد الإختمار تقسم العجين إلى كور صغيرة الحجم، نفرد كل كرة بسُمك واحد سنتيمتر.

* نرصها في صواني ونتركها لتختمر مدة ساعة او اكتر حسب الجو.

* بعد الإختمار تدخل فرن درجة حرارة 200 مع تشغيل الشواية في نفس الوقت مدة ربع ساعة مع المتابعة.

طريقة سهلة لتحضير المسقعة

طريقة سهلة لتحضير المسقعة

المسقعة أكلة حرشة و شعبية، طعمها لذيذ وموفرة، ممكن تعمليها في وجبة غدا وتوفري في ميزانيتك. كمان أخر الشهر لو مصروف البيت قصر معاكي المسقعة هتكون أول خيارات التوفير.

المقادير:

* باذنجان رومي شرائح سميكة.
* فلفل أخضر مقطع شرائح.
* ٣ فصوص ثوم مفروم.
* عصير طماطم.
* زيت للقلي.
* كسبرة ناشفة.
* ملح وفلفل.

الطريقة:

* نقلي الباذنجان والفلفل في الزيت.

* في صينية على النار نضيف مادة دهنية، ونضيف الثوم المفروم والكسبرة الناشفة ونشوحه حتى يأخذ لون ذهبي.

* نضيف عصير الطماطم والملح والفلفل ونتركها تتسبك.

* نرص شرائح الباذنجان والفلفل ونغطي الصينية على نار هادئة مدة خمس دقائق.

* تدخل تحت الشواية ليحمر الوجه، وتقدم مع عيش بلدي وجرجير.

الكشري الأصفر

طريقة عمل الكشري الأصفر (الإسكندراني) 

الكشري الأصفر أو الكشري الإسكندراني وجبة لذيذة و مغذية. يمكن تقديمها مع البيض المدحرج والبطاطس المحمرة والسلطة الخضراء.

المقادير:

* كوبان من الأرز المصري
* كوب و نصف من العدس الأصفر
* بصلة متوسطة
* زيت نباتي أو سمن

الطريقة:

* نغسل الأرز جيدا ونقعه في ماء لمدة  ربع ساعة.
* نغسل العدس جيد جدا
* في حلة على النار نضع المادة الدهنية ونشوح البصلة حتى تذبل.
* نضيف الأرز بعد تصفيته من ماء النقع ونضيف العدس و نشوحهم حتى تشرب كل حبة من المادة الدهنية.
* نضيف الماء بحيث يغطي الأرز فقط، ونضيف الملح.
* اول مايغلي نهدئ الشعلة و نتركه حتى ينضج.

وصفة نباتية للمكرونة

طريقة تحضير وصفة نباتية للمكرونة

أحيانا كثيرة بنكون عايزين أكلة خفيفة وسهلة كنوع من الراحة للمعدة وكمان بناخد أجازة من الطهي المرهق. الوصفة النهاردة مكسب كبير اوي للأشخاص النباتيين كمان. وصفة صحية وفي نفس الوقت لذيذة جدا.

المقادير:

* مكرونة ( أي نوع)
* زيت زيتون
* طماطم شرائئح
* فلفل ألوان شرائح
* زيتون مخلي شرائح
* كرفس
* مشروم
* بصل شرائح ( حسب الرغبة)
* جبن مشكل


الطريقة:

* في حلة هنضيف ماء وملح لسلق المكرونة.
* في حلة اخرى هنضيف الزيت ونشوحالمشروم والفلفل الالوان والكرفس والبصل, و بعد فترة نضيف الطماطم والزيتون.
* نصفي المكرونة من الماء ونضيفها على الخضار بعد تشويحه ونقلب المكونات و نضيف الملح والفلفل حسب الرغبة.
* نضيف الجبن ساعة التقديم وهي ساخنة.

طريقة عمل البسبوسة

طريقة عمل البسبوسة المكرملة الطرية

الحلويات مفضلة بالنسبة للجميع، ومحدش يقدر يقاوم وجودها من غير ما ياكل منها. والحلويات الشرقية أكثر تفضيلا حيث أن طعمها يكون أجمل وطريقة تحضيرها أبسط ومكوناتها متاحة دائما. هنقولك هنا على طريقة حلوة وسهلة جدا لعمل بسبوسة الحلواني. النتيجة مضمونة مليون المية والطعم تحفة.

المقادير:

* نص كيلو دقيق سميد.
* نص كوب سكر.
* معلقتين كبار جوز الهند.
* ملعقة صغير بيكنج باودر.
* معلقة كبيرة لبن بودرة.
* كوب سمن دافئ.
* كوب حليب دافئ.
* معلقة صغيرة عسل جلوكوز.

الطريقة:

* في إناء يوضع كل المكونات الجافة وتقلب بالملعقة.
* يضاف السمن ونبس الخليط جيدا.
* يضاف ملعقة عسل الجلوكوز إلى الحليب الدافئ مع التقليب حتى الذوبان.
* يضاف الحليب إلى خليط البسبوسة ويقلب مرتين فقط حتى تختلط المكونات.
* يسكب الخليط في صينية مقاس ٣٢ مدهونة سمن.
* يدخل فرن درجة حرارة ١٨٠ على الرف الأوسط مدة ٢٠ دقيقة حتى تحمر الجوانب، نفتح الشواية خمس دقائق.

لتحضير الشربات:

* ٢ كوب سكر
* ٢ كوب ماء
* معلقة صغيرة فانيليا

نسقي البسبوسة فور خروجها من الفرن بشربات ساخن.
جربي الطريقة دي وقوليلنا رأيك.

طريقة عمل العيش الفينو

طريقة عمل العيش الفينو في البيت

السندوتشات شئ أساسي صيف أو شتاء. في موسم المدارس أو في المصايف والرحلات. وطبعا العيش الفينو بيكون دايما هو النوع المفضل لأي سندوتش. عشان كدة جبنالك طريقة سهلة ومضمونة عشان تعمليه في بيتك بكل سهولة وتبقي ضامنة جودته ونضافته كمان.

المقادير

* نصف كيلو من الدقيق الابيض جميع الأغراض.

* رشة ملح.

* نصف كوب زيت نباتي.

* معلقة كبيرة خل.

* معلقة كبيرة سكر.

* معلقة كبيرة خميرة.

* ماء دافئ للعجن.

الطريقة

* في العجان ضعي كل المكونات مع إضافة الماء تدريجيا للحصول على عجينة طرية ومتماسكة.

* يترك العجين في مكان دافئ مدة نصف ساعة ليختمر.

* تُقسم العجينة إلى كرات صغيرة الحجم وتترك لتختمر مرة ثانية.

* يتم فرد كل كرة باستخدام النشابة على شكل بيضاوي بسُمك نصف سنتيمتر.

* لفي العجينة على شكل رول.

* ضعيه في صينية مدهونة زيت.

* يترك العيش ليختمر مرة ثالثة مدة نصف ساعة.

* يتم دهن الوش بخليط من معلقة نسكافيه ومعلقتين من الماء.

* يدخل فرن درجة حرارة ١٨٠ على الرف الأوسط مع تشغيل الشواية لمدة ربع ساعة او او  يأخذ لون ذهبي.

* فور خروجه يرش ببخاخ ماء، ويغطى بفوطة مطبخ.

وصفات للخُبز بدون فرن.

3 أنواع من الخُبز حضريه بدون فرن

يعد الخُبز هو الركن الأساسي على طاولة الطعام في أي وجبة، ولا تخلو منه أي مائدة. فرائحة الخبز وحدها هي فاتح للشهية. في هذا المقال سنسهل عليكي الأمر بثلاث وصفات للخُبز دون إستعمال الفرن، فقط باستخدام مقلاة.

خُبز الصاج

يستخدم في عمل سندوتشات سريعة مثل الشاورمة.
المقادير

٣ كوب دقيق جميع الأغراض
رشة ملح
٢ معلقة كبيرة زيت
كوب ماء مغلي او حسب العجن

الطريقة

* توضع جميع المكونات في العجان، مع إضافة الماء تدريجيآ حتى تحصل على عجينة متماسكة ولينة.
* تقسم العجينة إلى كور صغيرة في حجم البيضة، و تترك جانبآ لترتاح لمدة نصف ساعة.
* تفرد كل كرة بإستخدام النشابة للحصول على رغيف رقيق جدا.
* يتم خبزه على طاسة ساخنة على البوتجاز على نار متوسطة.
* يأخذ الرغيف ١٥ ثانية على كل جانب.
* يوضع الرغيف بعد النضج على صينية نظيفة ويتم تغطيته بفوطة مطبخ رطبة.

العيش الشامي

يوجد في المطاعم، وخاصة في وجبة المشويات.
المقادير

٤ كوب دقيق جميع الأغراض
رشة ملح
معلقة سكر
معلقة خميرة
ماء دافئ

الطريقة

*في العجان نضع المكونات الجافة مع إضافة الماء بالتدريج للحصول على عجينة متماسكة وطيعة.
* تترك العجينة في مكان دافئ لتختمر.
* تُشكل العجينة على شكل كور صغيرة الحجم وتترك لتختمر.
* تؤخذ كل كرة و يتم فردها بالنشابة للحصول على رغيف سُمكه نصف سنتيمتر.
* تُترك الأرغفة لتختمر مرة أخرى.
* يتم خبز العيش على الطاسة على نار متوسطة.
* يقلب الرغيف على الوجهين كل ٢٠ ثانية حتى ينتفخ ويتحمر.

العيش البلدي ( الأسمر)

أفضل الانواع حيث يسهل هضمه، يفضل أكله مع الأكلات الشعبية كالفول والطعمية.

المقادير

 كوب دقيق أسمر
كوب ونصف من الدقيق الأبيض
رشة ملح
معلقة سكر
معلقة خميرة
ماء دافئ للعجن

الطريقة

* توضع جميع المكونات في العجان مع اضافة الماء تدريجيا للحصول على عجينة متماسكة و طرية.
*  تترك العجينة في مكان دافئ لتختمر.
* تُشكل العجينة على شكل كور صغيرة الحجم وتترك لتختمر.
* تؤخذ كل كرة و يتم فردها بالنشابة للحصول على رغيف سُمكه نصف سنتيمتر.
* تُترك الأرغفة لتختمر مرة أخرى.
* يتم خبز العيش على الطاسة على نار متوسطة.
* يقلب الرغيف على الوجهين كل ٢٠ ثانية حتى ينتفخ ويتحمر.